దసరా లోపు యాదాద్రి థర్మల్ విద్యుత్ కేంద్రం పూర్తిస్థాయిలో విద్యుత్ ఉత్పత్తి చేయాలి: సీఎం ఎ. రేవంత్ రెడ్డి

హైదరాబాద్ బ్యూరో / తెలంగాణ అడ్డా:

​దసరా లోపు యాదాద్రి థర్మల్ విద్యుత్ కేంద్రం పూర్తిస్థాయిలో విద్యుత్ ఉత్పత్తి చేసే విధంగా తక్షణ చర్యలు తీసుకోవాలని ముఖ్యమంత్రి శ్రీ ఎ. రేవంత్ రెడ్డి గారు అధికారులను ఆదేశించారు. యాదాద్రి థర్మల్ విద్యుత్ కేంద్రంలో ఉత్పత్తికి అవసరమైన జీ-9 గ్రేడ్ బొగ్గు విషయంలో కేంద్ర బొగ్గు గనుల శాఖ మంత్రి జి. కిషన్ రెడ్డి గారితో వెంటనే చర్చించాలని ఉప ముఖ్యమంత్రి మల్లు భట్టి విక్రమార్క గారికి సూచించారు.

​సమావేశంలోని ముఖ్యాంశాలు:

​విద్యుత్ శాఖపై ముఖ్యమంత్రి గారు, ఉప ముఖ్యమంత్రి గారు కలిసి ఎంసీఆర్ హెచ్ఆర్‌డీ బోధి పెవిలియన్‌లో ఉన్నతస్థాయి సమీక్షా సమావేశం నిర్వహించారు. ఈ సందర్భంగా యాదాద్రి థర్మల్ కేంద్రంలో పూర్తి స్థాయిలో విద్యుత్ ఉత్పత్తి చేయకపోవడంపై అధికారులను ప్రశ్నించారు.

​యాదాద్రి కేంద్రానికి జీ-9 గ్రేడ్ బొగ్గు అవసరమని, సింగరేణిలో ఆ గ్రేడ్ బొగ్గు ఉత్పత్తి చేసే బ్లాకులు లేవని, భవిష్యత్తులోనూ ఆ అవకాశం లేదని అధికారులు తెలిపారు. పిట్ హెడ్‌పై కాకుండా దూరంగా నిర్మించడం వల్ల రాష్ట్రంపై రూ. 40 వేల కోట్ల అదనపు భారం పడుతోందని వివరించారు.

​గత ప్రభుత్వం బొగ్గు బ్లాకుల వేలంలో పాల్గొనకపోవడం వల్లే సింగరేణి నుంచి సరఫరా సాధ్యం కాలేదని, సింగరేణిలో ఇప్పటికే 14 బొగ్గు బ్లాకులు మూతపడ్డాయని అధికారులు వెల్లడించారు.

​ప్రస్తుత విద్యుత్ అవసరాల దృష్ట్యా మహానది కోల్ ఫీల్డ్స్, కోల్ ఇండియా నుంచి బొగ్గు కొనుగోలుకు చర్యలు ప్రారంభించాలని సీఎం ఆదేశించారు. ఎత్తిపోతల పథకాల పంపులకు ఎలాంటి ఆటంకం లేకుండా విద్యుత్ సరఫరా చేయాలని స్పష్టం చేశారు.

​ఈ సమావేశంలో ఎంపీ వేం నరేందర్ రెడ్డి, ప్రభుత్వ ప్రధాన కార్యదర్శి సంజయ్ జాజు, సీఎం సలహాదారు కె. రామకృష్ణారావుతో పాటు ఇంధన శాఖ, సింగరేణి ఉన్నతాధికారులు పాల్గొన్నారు.