బతుకమ్మ వేడుకల నిర్వహణలో బీజేపీ పాలకవర్గం విఫలం బీఆర్ఎస్ నగర అధ్యక్షుడు చల్ల హరిశంకర్
కరీంనగర్ బ్యూరో / తెలంగాణ అడ్డా:
మహిళలకు కేంద్ర సహాయ మంత్రి బండి సంజయ్ బహిరంగ క్షమాపణ చెప్పాలి
66 డివిజన్లలో లైటింగ్, మైకులు లేక చిమ్మచీకట్లో అల్లాడిన మహిళలు
కరీంనగర్ నగరపాలక సంస్థ పరిధిలో బతుకమ్మ వేడుకల నిర్వహణలో నిర్లక్ష్యంగా వ్యవహరించి ఆడపడుచులను తీవ్ర ఇబ్బందులకు గురిచేసిన బీజేపీ పాలకవర్గం తరుపున కేంద్ర హోంశాఖ సహాయ మంత్రి బండి సంజయ్‌కుమార్ బహిరంగ క్షమాపణ చెప్పాలని బీఆర్ఎస్ నగర అధ్యక్షుడు చల్ల హరిశంకర్ డిమాండ్ చేశారు. తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగకు కనీస ఏర్పాట్లు చేయకపోవడం నగర మహిళలను, బతుకమ్మ తల్లిని అవమానించడమేనని మండిపడ్డారు.
సోమవారం కరీంనగర్‌లోని మంకమ్మతోటలోగల తన డివిజన్‌ కార్యాలయంలో ఏర్పాటు చేసిన విలేకరుల సమావేశంలో ఆయన మాట్లాడారు.
చిమ్మచీకట్లో బతుకమ్మ సంబరాలు - ప్రధాన విమర్శలు:
ప్రాథమిక వసతుల లేమి: నగరంలోని 66 డివిజన్లలో బతుకమ్మ ఆడే ప్రాంతాలు, నిమజ్జన పాయింట్ల వద్ద సరైన లైటింగ్, మైకులు, సౌండ్ సిస్టమ్స్ ఏర్పాటు చేయలేదని విమర్శించారు. అనేక చోట్ల పూర్తి చిమ్మచీకటి నెలకొనడంతో మహిళలు సెల్‌ఫోన్ లైట్ల వెలుతురులోనే బతుకమ్మ ఆడి నిమజ్జనం చేయాల్సిన దుస్థితి ఏర్పడిందన్నారు.
పక్షపాత వైఖరి: మేయర్, డిప్యూటీ మేయర్ ప్రాతినిధ్యం వహించే డివిజన్లలో మాత్రమే కొన్ని ఏర్పాట్లు చేసి, మిగతా డివిజన్లను పూర్తిగా నిర్లక్ష్యం చేశారని ఆరోపించారు. రాజకీయాలకు అతీతంగా నగరంలోని అన్ని ప్రాంతాల్లో సమానంగా సౌకర్యాలు కల్పించాల్సిన బాధ్యతను బల్దియా విస్మరించిందన్నారు.
గత కేసీఆర్ పాలనతో పోలిక: తెలంగాణ సిద్ధించిన తర్వాత కేసీఆర్ హయాంలో ఎంగిలిపూల బతుకమ్మ నుంచి సద్దుల బతుకమ్మ వరకు 9 రోజుల పాటు ప్రత్యేక వేదికలు, విధ్యుద్దీప కాంతులు, సౌండ్ సిస్టమ్స్‌తో పండుగను వైభవంగా నిర్వహించేవారని గుర్తుచేశారు.
కేంద్ర మంత్రి, బల్దియా పాలకవర్గం సమాధానం చెప్పాలి:
ఎన్నికల సమయంలో నగరాన్ని అభివృద్ధి చేస్తామని, పండుగలను ఘనంగా నిర్వహిస్తామని హామీలు ఇచ్చిన కేంద్ర మంత్రి బండి సంజయ్, నగర మేయర్, డిప్యూటీ మేయర్లు ఈ ఘోర వైఫల్యానికి నైతిక బాధ్యత వహించాలని డిమాండ్ చేశారు. జరిగిన లోపాలు పునరావృతం కాకుండా రాబోయే దసరా సందర్భంగా నిర్వహించే 16 ప్రాంతాల రావణ దహనం, రామలీలా, జమ్మి పూజల వద్దైనా సరైన విద్యుత్, సౌండ్ సౌకర్యాలు కల్పించాలని కోరారు.
ఈ విలేకరుల సమావేశంలో బీఆర్ఎస్ మాజీ కార్పొరేటర్లు దిండిగాల మహేష్, బోనాల శ్రీకాంత్, నగర ప్రధాన కార్యదర్శి గడ్డం ప్రశాంత్ రెడ్డి, మైనార్టీ నగర అధ్యక్షుడు మీర్ సౌకత్ అలీ, నియోజకవర్గ యూత్ ప్రధాన కార్యదర్శి గంగాధర చందు, నాయకులు బండ శ్రీకాంత్, మిడిదొడ్డి నవీన్ కుమార్, ఆరే రవిగౌడ్, చేతి చంద్రశేఖర్, మేరుగు శ్రీనివాస్, తొంటి రాజేందర్, నారదాసు వసంత రావు, సైఫ్, కిరణ్, విజ్ఞాన్ శ్రీనివాస్ తదితరులు పాల్గొన్నారు.