ఢిల్లీలో ఘోర ప్రమాదం.. సత్యనికేతన్‌లో కుప్పకూలిన భారీ భవనం

ఢిల్లీలో ఘోర ప్రమాదం.. సత్యనికేతన్‌లో కుప్పకూలిన భారీ భవనం

ఢిల్లీ ప్రతినిధి / తెలంగాణ అడ్డా

దేశ రాజధాని ఢిల్లీలోని సత్యనికేతన్‌ ప్రాంతంలో ఆదివారం మధ్యాహ్నం భారీ భవనం కుప్పకూలి తీవ్ర విషాదం చోటుచేసుకుంది. ఢిల్లీ యూనివర్సిటీ సౌత్ క్యాంపస్‌కు సమీపంలోని ఈ భవనాన్ని విద్యార్థుల పీజీ వసతి గృహంగా ఉపయోగిస్తున్నట్లు సమాచారం.

భవనం కూలిన వెంటనే ఢిల్లీ పోలీసులు, అగ్నిమాపక సిబ్బంది, విపత్తు నిర్వహణ బృందాలు రంగంలోకి దిగి సహాయక చర్యలు చేపట్టాయి. ఎన్డీఆర్‌ఎఫ్ బృందాలు కూడా ఘటనా స్థలానికి చేరుకుని శిథిలాలను తొలగిస్తూ, లోపల చిక్కుకున్న వారిని గుర్తించే ప్రయత్నం చేస్తున్నాయి.

తాజా నివేదికల ప్రకారం ఇప్పటివరకు ముగ్గురు మృతి చెందగా, ఆరుగురిని సురక్షితంగా బయటకు తీసినట్లు సమాచారం. మరికొందరు శిథిలాల కింద చిక్కుకుని ఉండొచ్చన్న అనుమానంతో రెస్క్యూ ఆపరేషన్ కొనసాగుతోంది.

భవనం కూలడానికి గల కారణాలపై అధికారులు దర్యాప్తు చేస్తున్నారు. ప్రాథమికంగా భవనం బేస్‌మెంట్‌లో జరుగుతున్న నిర్మాణ/మరమ్మతు పనులు ప్రమాదానికి కారణమై ఉండొచ్చన్న అనుమానాలు వ్యక్తమవుతున్నాయి.

ఢిల్లీలో భారీ వర్షాల నేపథ్యంలో భవనాల భద్రతపై మరోసారి ఆందోళనలు వ్యక్తమవుతున్నాయి. ఇదే సమయంలో ఈ ఘటనపై అధికారులు పూర్తి స్థాయి విచారణ చేపట్టారు.